《起跑线》观后感
我觉着,印度电影《起跑线》选了最近搿个档期上片是有“野心”个。四月中旬以后,今年上海公办脱民办小学个招生工作就陆陆续续开始了。我儿子正好也是今年“幼升小”。
先来讲讲电影。《起跑线》,我勿晓得伊原本个印度片名是啥,单看搿只翻译名,噢哟,搿勿是现在大大小小市场化个教育培训机构最热衷宣导个“卖点”嘛。电影里,一对暴发户爷娘为了让自家囡儿进名牌小学读书,可以讲是无所不用其极。先是调房子,大家懂个,学区房嘛,邻居一记头变得老高级个,但高级邻居们又看勿上伊拉一家门。接下来是为招生面试做准备,爷娘帮小囡一道上辅导班,大家懂个,搿排“辅导”末,就是勿拨侬想讲啥就讲啥,赛过是教侬做戏,拿假话当真话,拿面具当皮肤。几场面试下来,统统勿着港,托关系、送红包好像也侪行勿通,真是极煞人啊!再看到自家公司里个伙计,伊拉个小人倒是被名校录取了,为啥呢?因为伊拉“穷”,可以享受贫困生特招名额。
乃末,搿对爷娘开始动脑筋了,伪造了一大刀文件,想通过“装穷”来骗到特招个名额,外加,为了应付学堂老师个家访,伊拉真个带了小人搬到贫民窟里向去住了。有个细节蛮值得回味个。电影里埃个大老板爸爸辣成功骗过家访老师以后,欣喜若狂,挨着要交学费了,搿笔费用末,对伊拉肯定是毛毛雨咾,但又勿敢多响,只好趁了半夜,迓迓叫去取款机拿钞票。就辣搿个辰光拨伊个穷邻居看到了,人家当伊穷到要去抢银行唻。葛肯定勿来三个咾!搿位邻居伯伯真个是好人啊,为了帮朋友凑学费,竟然去“碰瓷”噢!我看到此地,心里向觉着搿人简直是单纯到“戆”个程度了!但,又拨伊搿种天然个“戆劲”所感动。
并勿是所有满足入学要求个贫困学生侪可以进搿所名校读书个,还要经过抽签,再好最终确定。结果,老板个囡儿拨抽中,邻居个儿子却呒没介好个运道。然后,搿对老板夫妻出资翻新了当地个公办小学。纸头包勿牢火,“装穷”个闹剧拨老邻居拆穿了,但人家呒没去学堂里揭发伊。一系列个事体,包括校长两面三刀个虚伪面目,让搿对原本只为了自家囡儿着想个爷娘重新思考了关于教育脱做人个问题,与其勿光彩个“得到”,勿如坦荡个“放弃”。最后,伊拉做出了向“良知”、“公义”靠拢个选择。
电影尾声个辰光,脑子清爽过来个老板爸爸有一段演讲式的独白,我相信,也是讲出了老多家长想讲又勿敢讲个言话。其实,辣搿部两个多钟头个片子当中,还有勿少值得深思个台词。比方,穷人邻居讲“有身份个人再配有名字”;富翁讲“政客偷窃穷人个粮食,建筑商偷窃穷人个土地,富人偷窃穷人家个小囡读书个权利”。尤其是名校个女校长辣扯破面皮之后,伊讲伊根本勿怕拨揭发,因为啥人啥人啥人,伊拉个小人,侪辣我此地读书!搿搭个“啥人”,总归是高级人物或者精英阶层咾。是啊,后台介结棍,言下之意,伊拉再是“游戏规则”个制定者,侬一个暴发户覅拎勿清,肯让侬一道来“白相”就是拨侬面子了。虽然电影讲个是印度,但搿些情节,帮阿拉现在身边出现个情况,简直是“神同步”了!
实话实讲,我本人是蛮反感“赢在起跑线”搿种讲法个,搿根线由啥人来划?哪能再算是“赢”?既然是“起跑线”,意思就是比赛还呒没开始,葛末,又凭啥个物事来分输赢呢?尤其是辣侬个小人覅讲“跑”唻,连得“立”帮“走”都勿会个辰光,就急急忙忙个要伊拉搿能埃能了。搿里向,老多就是大人自家个一厢情愿,甚至是虚荣心辣作怪。我个意思当然勿是讲做爷娘个覅去关心自家小人个前途,不过,用哪能个方式、啥个辰光该紧啥个辰光该松、以阿里种出发点为侧重,是勿是真个需要介急、侬急了又是勿是有用……搿些问题,同样也是蛮值得考量个。就算一时头浪寻勿着答案,起码辣阿拉做决定前头要先了解自家个小人,并愿意尊重小人个意见。爷娘是子女个镜子,我始终觉着,侬爷娘假使自家做勿到个事体,呒没啥道理硬劲要小人代侬来完成。
稍为扯开一眼,我想讲几句我自家关于印度电影个看法。印度是一个历史长、人口多个国家。贫富差异非常大,辣社会结构以及稳定度方面,也是交关复杂个。印度个电影产业邪气发达,阿拉侪讲印度片子好看,我觉着,除脱大量歌舞元素以外,伊还有几个比较明显个特点。
比方,线条流畅个叙事风格、紧凑个节奏感、突出个主题性,辣情感表达个方式高头,也是比较正面帮直接个。外加,可能是受传统歌舞片个影响比较大,让伊拉个新派电影里向,仍旧保留了一种整齐明快个画面质感。虽然讲现在个印度电影里向商业化痕迹也是蛮明显个,又或者讲,伊拉拍出来个搿些,脱实际个生活状态也勿是完全一致个。
但是能够苦中作乐,从苦难之中看到希望,而勿是片面个拿苦难放大甚至“妖魔化”,搿就让伊拉个电影,有种独特个感染力。
电影搿样物事,本来就勿是解决社会问题个工具,伊个一部分功能只不过是拿社会当中个某些问题,艺术化个表现出来而已。我经常会得听到人家讲,为啥阿拉现在拍出来个电影是越来越勿好看了呢?我认为,起码有一个原因是:有“大本事”个导演,忒看勿起观众;呒没“大本事”个导演呢,又忒想讨好观众,所以让所谓个主流电影,变得越来越模式化----要末忒“硬”,要末忒“花”,要末忒“暗”,缺乏了脱观众平等交流个姿态。
看过《起跑线》,肯定有观众会质疑,噢哟,拍电影呀,讲讲个呀,现实生活里,有几个爷娘做得到搿能个“知错就改”“明辨是非”啦?再讲,伊拉屋里反正是大户,小人就算勿辣搿搭读、勿辣埃搭读,葛选择个余地,总归还是比穷人家多个呀。搿点讲法确实是有道理个。不过,伊里向反映出个教育资源辣分配高头个矛盾,以及为人父母辣面对搿类矛盾辰光个各种焦虑,侪体现出了搿部片子个现实意义。
有交关寄望于“书包翻身”个大人,虽然辣伊拉个内心里也晓得介小个小人,现在应当是白相个辰光,但就是一句言话,伊拉觉着“侬假使现在勿逼勿抓勿努力,将来就更加吃力了”。我倒并勿是搿能认为个。如果拿“将来”当成“终点”,现在是“起点”,过程可以选择勿同个路径,学堂教育也好,家庭教育也好,校外培训也好,甚至是自学成才侪好。培养小人,量力而行是基础,因材施教再是关键,勿是侬拨伊个物事越多越贵就是越好个。反正“终点”勿变个说话,殊途同归个道理,只有到了辰光再晓得结果。其他个“预判”,侪不过是“未雨绸缪”个准备工作,其中个变数呢?啥人讲得准呢?是[口伐]啦?所以,阿拉勿妨先拿埃根“线”揩揩脱,等小人上了跑道再随机应变。
最后再讲一只小细节,电影里个小姑娘大概是到贵族学堂试读,其他小朋友侪勿帮伊白相,因为伊讲印地语,而伊拉侪是讲英文。